Er guð til?

Nú hefur umræða verið í gangi hjá Don Hrannari um það hvort trúaðir séu heimskari en trúlausir. Sú umræða hefur mér fundist hingað til vera til fyrirmyndar. Fáir fóru í skítkast og ég sé ekki betur en að enginn gangi sár frá þeim vettvangi.

Mér datt hins vegar í hug út frá þeirri umræðu að samtöl trúlausra og trúaðra hafa oftar en ekki snúist um einstök atriði trúar eða málefni eins og í þessari grein Hrannars. Þannig hefur umræðan oft farið að miklu leiti í skilgreiningar á orðum og hugtökum.

 Mig langar hins vegar að færa umræðuna í þetta skiptið þangað sem áhugasvið mitt liggur og vona að einhver annar hafi áhuga á því.

Því er ég með spurningu til þeirra sem trúa á guð.

Er einhver leið að sanna að guð sé til? Þá á ég við, er einhver leið til að margir geti framkvæmt sömu prófunina og komist að sömu niðurstöðu?

 Mér þætti gaman að sjá slíkar sannanir og hvort þær eigi við einhver rök að styðjast.